Ferðalög um Ísland

Hvenær er best að ferðast?

Akstur á Íslandi

Flestir ferðamenn ferðast um landið á bílaleigubíl. Á Íslandi er hægri umferð og skylt er að aka með ökuljós allan sólarhringinn. Hámarkshraði er almennt 90 km/klst. á malbikuðum vegum, 80 km/klst. á malarvegum og 50 km/klst. í þéttbýli, nema annað sé tekið fram. Á mörgum vegum eru einbreiðar brýr – þar á sá forgang sem fyrr kemur að brúnni. Blindhæðir eru algengar og merktar sérstaklega.

• Kynnið ykkur færð á umferdin.is áður en lagt er af stað.
• Sviptivindar geta feykt bílum út af veginum; opnið bílhurðir varlega í hvassviðri.
• Búfé gengur laust víða um land á sumrin – akið varlega.
• Utanvegaakstur er stranglega bannaður og varðar háum sektum.
• F-vegir á hálendinu eru aðeins fyrir fjórhjóladrifna bíla. Sjá nánar um hálendið.
• Stöðvið aldrei á miðjum vegi til að taka myndir.

Öryggi á ferðalögum

Íslensk náttúra getur verið hættuleg. Veður breytist hratt, ár vaxa, jöklar eru sprungnir og öldur við suðurströndina geta verið lífshættulegar. Slysavarnafélagið Landsbjörg rekur vefinn safetravel.is þar sem hægt er að skrá ferðaáætlun og fá viðvaranir. Björgunarsveitir landsins eru skipaðar sjálfboðaliðum sem eru tilbúnir að bregðast við allan sólarhringinn.

Gisting

Á Íslandi er fjölbreytt úrval gistingar: hótel, gistiheimili, farfuglaheimili, sumarhús, bændagisting og tjaldsvæði. Á sumrin er ráðlegt að bóka gistingu tímanlega, einkum á vinsælum stöðum eins og á suðurströndinni og við Mývatn. Á hálendinu eru fjallaskálar reknir af Ferðafélagi Íslands, Útivist og fleiri félögum.

Samkvæmt náttúruverndarlögum er heimilt að tjalda einni nótt á óræktuðu landi utan þéttbýlis, en þó ekki þegar tjaldsvæði er í næsta nágrenni eða landeigandi hefur bannað það. Húsbílum og tjaldvögnum skal ávallt lagt á tjaldsvæðum.

Almannaréttur og umgengni

Almannaréttur tryggir fólki rétt til að fara um landið, en honum fylgja skyldur. Gangið vel um, takið rusl með ykkur, farið ekki inn á afgirt land án leyfis og truflið ekki búfé eða villt dýr. Gangið á merktum stígum og raskið ekki mosa eða viðkvæmum gróðri. Hleðsla vörðna og steinhleðslna er óæskileg og getur valdið ruglingi.

Hagnýtar upplýsingar

• Gjaldmiðill: Íslensk króna. Greiðslukort eru tekin nær alls staðar, líka fyrir smáupphæðir.
• Tungumál: Íslenska, en flestir tala góða ensku.
• Rafmagn: 230 V, evrópskar innstungur af gerð F.
• Tími: UTC allt árið, engin sumartími.
• Vatn: Kranavatnið er hreint og öruggt að drekka.
• Almenningssamgöngur: Strætó ekur um landið, en tíðni ferða er lítil utan höfuðborgarsvæðisins.
• Innanlandsflug: Flogið er frá Reykjavíkurflugvelli til Akureyrar, Egilsstaða, Ísafjarðar og fleiri staða.