Gullni hringurinn

Leiðin

Hefðbundin leið liggur frá Reykjavík um Mosfellsbæ og Mosfellsheiði til Þingvalla (um 45 km). Þaðan er ekið um Lyngdalsheiði að Laugarvatni og áfram að Geysi í Haukadal (um 60 km). Gullfoss er um 10 km lengra. Til baka er oft farið um Skálholt, Kerið og Hveragerði, eða um Flúðir. Hringurinn allur er um 230–300 km eftir því hvaða leið er valin.

Þingvellir

Á Þingvöllum var Alþingi stofnað árið 930 og þar sjást flekaskil Norður-Ameríku og Evrasíu berum augum. Gengið er niður Almannagjá að Lögbergi og Öxarárfossi. Í gjánni Silfru er hægt að kafa og snorkla í kristaltæru vatni. Þingvellir eru þjóðgarður og á heimsminjaskrá UNESCO. Lesa má meira á síðunni um Alþingi og Þingvelli.

Geysir og Strokkur

Hverasvæðið í Haukadal er eitt þekktasta jarðhitasvæði heims. Geysir sjálfur gýs sjaldan en Strokkur gýs á 5–10 mínútna fresti og vatnssúlan getur náð 20–40 metra hæð. Gestir eru beðnir um að halda sig innan kaðla, enda er vatnið í hverunum sjóðandi heitt.

Gullfoss

Gullfoss er einn fegursti foss landsins. Hvítá steypist í tveimur þrepum, 11 og 21 metra, ofan í um 70 metra djúpt gljúfur. Á sólríkum dögum myndast oft regnbogi í úðanum. Á veturna getur fossinn verið hálffrosinn og stórkostlegur á að líta. Minnisvarði um Sigríði í Brattholti stendur við fossinn.

Aðrir viðkomustaðir

• Friðheimar í Reykholti – gróðurhús þar sem boðið er upp á tómatsúpu inni á milli tómatplantnanna.
• Laugarvatn Fontana – heilsulind þar sem rúgbrauð er bakað í heitum hver.
• Faxi – fallegur foss í Tungufljóti.
• Brúarfoss – blár foss sem gengið er að eftir stíg.
• Sólheimar í Grímsnesi – sjálfbært samfélag, stofnað 1930.
• Efstidalur – sveitabær með ísbúð þar sem kýrnar sjást í gegnum glugga.
• Secret Lagoon á Flúðum – Gamla laugin, elsta sundlaug landsins.